Казакі павязуць паходню Алімпіяды ў Сочы на камбайне, конях і дэльфіне

• 10.10.2013, 21:16

Краснадарскі край афіцыйна прыме эстафету Алімпійскага агню а 8:00 4 лютага 2014 года на мосце праз раку Кубань у горадзе Усць-Лабінск, пасля чаго носьбіты паходні даставяць яе ў Сочы.

Пра гэта паведаміла прэс-служба краявога міністэрства фізічнай культуры і спорту ў чацвер.

Па тэрыторыі краю Алімпійскі агонь пранясуць 600 носьбітаў пры падтрымцы 1000 валанцёраў. Найбольш важныя пункты маршруту - Краснадар і Сочы. У ліку ўдзельнікаў эстафеты будуць вядомыя спартоўцы, дзеячы культуры, настаўнікі, работнікі сельгаспрадпрыемстваў, грамадскія дзеячы.

Асаблівасцю кубанскага этапу эстафеты на Кубані стане "алімпійскі транспарт". У паведамленні адзначаецца, што агонь Алімпіяды будуць несці і збожжавы камбайн, які сімвалізуе багацце і моц кубанскай зямлі, і конная група ганаровай варты Кубанскага казацкага войска. Мяркуецца нават задзейнічаць самае высокае ў Расеі кола агляду, якое знаходзіцца ў Лазарэўскім пад Сочамі. Там жа, у Лазарэўскім дэльфінарыі, яшчэ адным сродкам дастаўкі носьбітаў стане жывы дэльфін.