На шклоўскім заводзе выявілі крадзяжы

• 17.01.2013, 16:34

Рыхтуецца ўзбуджэнне крымінальнай справы.

17 студзеня на прэс-канферэнцыі ў Магілёве начальнік УУС Магілёўскага аблвыканкама Фёдар Балейка паведаміў, што праведзеная супрацоўнікамі міліцыі праверка на РВУП «Завод газетнай паперы» ў Шклоўскім раёне Магілёўскай вобласці выявіла крадзяжы, па якіх рыхтуецца да ўзбуджэння крымінальная справа, піша БелаПАН.

Нагадаем, у снежні 2012 года дырэктар РВУП «Завод газетнай паперы» Анатоль Хмялеўскі пацвердзіў БелаПАН факт праверкі прадпрыемства супрацоўнікамі абласнога аддзела па барацьбе з эканамічнымі злачынствамі (АБЭЗ).

У той жа час Балейка адзначыў, што пакуль казаць пра вынікі праверкі рана. «Праверка праводзіцца ў дачыненні да службовых асоб. Вынікі будуць. Устаноўленыя факты крадзяжу. Крымінальная справа пакуль не распачатая, але будзе распачатая ў бліжэйшы час», - заявіў ён.

Па словах начальніка абласнога ўпраўлення міліцыі, у цяперашні час на прадпрыемстве прызначаныя экспертызы і рэвізіі.

Як раней заяўляў Хмялеўскі, праверка на заводзе ажыццяўляецца па «малазначным факце». «Гэта малазначны факт, ён не мае ніякага дачынення да агульнага функцыянавання завода», - сказаў дырэктар прадпрыемства.