Нацбанк на год пазбавіў ліцэнзіі іранскі «ТК Банк»

• 6.08.2012, 17:10

Нацбанк прыпыніў на 1 год дзеянне ліцэнзіі ЗАТ «ТК Банк» (Гандлёвы капітал) на ажыццяўленне банкаўскай дзейнасці.

«ТК Банк» з'яўляецца даччыным банкам іранскага банка Тэджарат (доля 99,89%), піша АФН.

«Дадзенае рашэнне прынята ў сувязі з невыкананнем ЗАТ «ТК Банк» прадпісання аб устараненні парушэнняў заканадаўства Рэспублікі Беларусь і накіравана на абарону інтарэсаў крэдытораў банка», - паведаміў рэгулятар.

«ТК Банку» забаронена прыцягваць дэпазіты фізічных і юрыдычных асоб, выдаваць банкаўскія гарантыі, ажыццяўляць траставае кіраванне сродкамі, эмітаваць пластык і ажыццяўляць выпускі каштоўных папер, факторынгавыя аперацыі.

Прыпыненне ліцэнзіі не прывядзе да ўзнікнення ў ЗАТ «ТК Банк» абавязацельстваў па датэрміновым выкананні дагавораў з укладчыкамі і іншымі крэдыторамі, запэўнілі ў Нацбанку РБ.

«Усе абавязацельствы ЗАТ «ТК Банк» будуць выконвацца ў адпаведнасці з раней заключанымі дагаворамі», - гаворыцца ў паведамленні НБ РБ.