Пенсіянеры і бюджэтнікі застануцца без «агароднінавых» 500 тысяч

• 29.08.2012, 13:31

У мінулым годзе аднаразовую матэрыяльную дапамогу для закупкі сельгаспрадукцыі ў памеры 500 тыс. рублёў атрымалі беларускія пенсіянеры і бюджэтнікі.

Аднак у гэтым годзе такая мера не плануецца. Міністр працы і сацыяльнай абароны Мар'яна Шчоткіна паведаміла пра гэта сёння, перадае БелТА.

Міністр адзначыла, што на працягу гэтага года ўжо тройчы павялічвалася тарыфная стаўка першага разраду (з 1 студзеня, з 1 траўня і з 1 верасня). З верасня яе памер складае 225 тыс. рублёў.

Рабіўся штоквартальны пераразлік памераў працоўных пенсій (апошні пераразлік быў у жніўні, наступны чакаецца ў лістападзе бягучага года). «З улікам мер, што прымаюцца па падтрымцы ўзроўню даходаў насельніцтва вылучэнне матэрыяльнай дапамогі ў цяперашні час не плануецца», - сказала Мар'яна Шчоткіна.