Еўразвяз стварае фонд для барацьбы з тыранамі

• 26.06.2012, 13:45

Міністры замежных спраў ЕЗ учора дамовіліся аб стварэнні Еўрапейскага фонду для дэмакратыі.

Мэта яго стварэння - «падтрымаць глыбінныя і незваротныя змены ў грамадствах, якія знаходзяцца пад прыгнётам дэспатычных рэжымаў». У першую чаргу, як піша брусельскае выданне EUobserver (пераклад - charter97.org), гэта датычыцца Беларусі, дзе людзі знаходзяцца ў турмах за тое, што выступаюць супраць Аляксандра Лукашэнкі.

Фонд пачне функцыянаваць у наступным годзе. Ён будзе фінансавацца за кошт дзяржаў-сябраў ЕЗ і Еўрапейскай камісіі.

Па словах міністра замежных спраў Польшчы Радаслава Сікорскага, гэтая ўстанова будзе аказваць хуткую і эфектыўную дапамогу краінам, якія знаходзяцца ў непасрэднай блізкасці ад межаў Звяза.

Таксама міністры замежных спраў прынялі стратэгію ў адносінах да абароны правоў чалавека і дэмакратыі і вырашылі ўвесці пасаду спецпрадстаўніка па правах чалавека, паведамляе сайт Рады ЕЗ. Заснаваць новую пасаду прапанавала вярхоўны прадстаўнік Еўразвяза па замежных справах і палітыцы бяспекі Кэтрын Эштан. Яе падтрымалі кіраўнікі знешнепалітычных ведамстваў.

Рада лічыць, што пасаду спецыяльнага прадстаўніка ЕЗ па правах чалавека павысіць эфектыўнасць і празрыстасць дзейнасці Еўразвяза ў гэтай сферы.

Хутчэй за ўсё, спецпрадстаўнік будзе прызначаны на працягу тыдня.

Прадстаўнік ЕЗ па правах чалавека Лотэ Лейхт заявіла, што гэтыя планы з'яўляюцца рэакцыяй на апошнія сусветныя падзеі, калі людзі паўставалі і звяргалі дэспатаў.

«Нам спатрэбіцца цяжкая праца па ўвасабленні гэтых планаў у жыццё», - рэзюмавала яна.