БРСМ будзе зарабляць на працы падлеткаў

• 4.04.2012, 13:02

Беларускі рэспубліканскі саюз моладзі плануе ў 2012 годзе прымаць у студатрады школьнікаў ва ўзросце ад 14 гадоў.

Аб гэтым сёння журналістам паведаміў першы сакратар ЦК ГА «БРСМ» Ігар Бузоўскі, перадае БелТА.

Магчымасць уключаць у студэнцкія атрады школьнікаў ва ўзросце ад 14 гадоў БРСМ плануе замацаваць на заканадаўчым узроўні. Для гэтага саюз моладзі ініцыяваў змены і дапаўненні ва ўказ № 222 аб некаторых пытаннях арганізацыі дзейнасці студэнцкіх атрадаў у Беларусі. Зараз дакумент знаходзіцца на разглядзе ў Адміністрацыі прэзідэнта, сказаў Ігар Бузоўскі. «Мэта новаўводзінаў - даць школьнай моладзі магчымасць зрабіць першы крок у студэнцкае жыццё і адначасова цалкам прыстойна зарабіць», - адзначыў першы сакратар.

Ігар Бузоўскі нагадаў, што трэці працоўны семестр «Лета-2012» будзе распачаты 1 мая. Аднак ужо зараз Рэспубліканскі штаб студэнцкіх атрадаў ГА «БРСМ» фарміруе моладзевыя працоўныя атрады: вядзе пошук вакансій, набірае працавітых студэнтаў, якія жадаюць атрымаць дадатковую прафесію, набыць новыя ўражанні, завесці новых сяброў і, вядома ж, зарабіць свае першыя мільёны.