Добраахвотна-прымусова

• 3.12.2012, 11:06

У Глыбокім настаўнікаў на выходных прымушаюць бясплатна працаваць будаўнікамі.

Настаўнікаў з некалькіх школ Глыбоцкага раёна цэнтралізавана прывезлі ў вёску Лучайка, дзе яны павінны былі разбіраць закінутыя цагляныя будынкі.

Афіцыйна гэта называлася «добраўпарадкаванне вёскі». А адбывалася гэта 1 снежня пад Глыбокім у рамках абласнога суботніка, дарэчы, ужо трэцяга на працягу восені. Пра гэта «Еўрарадыё» паведаміў незалежны журналіст з Глыбокага Кастусь Шыталь.

Паводле яго слоў, самі настаўнікі баяцца пад сваімі імёнамі распавядаць пра вытваранае мясцовымі чыноўнікамі бязмежжа, але ў прыватных размовах абураюцца сітуацыяй. Бо на такія «добраахвотна-прымусовыя» працы іх павезлі ў свой выходны, і гэтая праца ніяк не аплочвалася.

Журналіст нагадвае, што акрамя афіцыйных суботнікаў, падчас уборкі ўраджаю глыбоцкіх настаўнікаў прымушалі ў выходныя збіраць лён.