Расейскі суд апраўдаў абвінавачанага па справе Магніцкага
- 28.12.2012, 13:52
Былы намеснік начальніка СІЗА «Бутырка» Дзмітрый Кратаў апраўданы Цвярскім судом Масквы ў сувязі з адсутнасцю ў яго дзеяннях складу злачынства.
Суд прыйшоў да высновы, што абвінавачванне ў халатнасці не знайшло пацвярджэння, перадае ВВС.
Згодна з выніковым вердыктам, Дзмітрый Кратаў арганізаваў неабходную шпіталізацыю Магніцкага, «прыняў усе неабходныя меры для лячэння выяўленых захворванняў» і дзейнічаў у адпаведнасці з інструкцыяй.
Справа закрытая ў сувязі з адсутнасцю складу злачынства. Суддзя прызнаў, што Кратаў мае права дамагацца рэабілітацыі за неправамерны пераслед.
Абарона сям'і Магніцкага заявіла аб намеры абскардзіць апраўдальны прысуд. На гэта бакам адводзіцца 10 дзён.
«Мы з прысудам катэгарычна не згодныя, хоць ён быў чаканым. Нам у гэтым працэсе адвялі ролю статыстаў», - заявіў адвакат Мікалай Гарохаў.
Сам Кратаў паведаміў, што мае намер працягваць працаваць у крымінальна-выканаўчай сістэме.
На судовым пасяджэнні ў панядзелак пракурор Дзмітрый Бокаў папрасіў суд апраўдаць Кратава, так як, згодна з заключэннем экспертаў, юрыст Hermitage Capital памёр ад сардэчнай недастатковасці, а не ад панкрэанекрозу або якіх-небудзь іншых прычын.
«Паміж дзеяннямі абвінавачанага Кратава і смерцю Сяргея Магніцкага адсутнічае прычынна-следчая сувязь», - сказаў пракурор.
Як заявіў Бокаў, згодна з заключэннем замоўленай следствам экспертызы, хваробы, якія дыягнаставалі ў Магніцкага «самі па сабе не былі прычынай смерці».
«Фактычна можна казаць пра знясіленне энергетычнага рэсурсу сардэчнай мышцы», - сказаў пракурор, выказаўшы здагадку, што прычынай гэтага знясілення маглі быць «фізічныя нагрузкі або псіхаэмацыйны стрэс».
У апошнім слове Дзмітрый Кратаў сказаў, што шкадуе аб смерці Сяргея Магніцкага, але не лічыць сябе ў ёй вінаватым. На пытанне хто ж у ёй вінаваты, Кратаў адказваць адмовіўся.
Маці і ўдава Сяргея Магніцкага і іх адвакаты лічаць, што Дзмітрый Кратаў быў прызначаны «стрэлачнікам", а следства, абвінавачванне і суд пастараліся зрабіць так, каб рэальныя вінаватыя пераследу і смерці юрыста сышлі ад адказнасці.
Аўдытар інвестыцыйнага фонду Hermitage Capital Сяргей Магніцкі быў арыштаваны ў лістападзе 2008 года па абвінавачванні ў тым, што дапамагаў кіраўніку кампаніі Уільяму Браўдэру ўхіляцца ад выплаты падаткаў.
Незадоўга да гэтага Магніцкі абвінаваціў групу міліцэйскіх чыноў і падатковых інспектараў у тым, што яны з дапамогай выкрадзеных дакументаў некалькіх фірмаў Браўдэра скралі з дзяржбюджэту 5,4 млрд рублёў (230 млн даляраў ЗША). Арыштавалі Магніцкага тыя самыя людзі, якіх ён абвінаваціў.
На працягу 11 месяцаў Магніцкі знаходзіўся ў «Бутырцы», а затым быў пераведзены ў «Матроскцю цішыню», дзе і звярнуўся за медыцынскай дапамогай.
Смерць юрыста ў лістападзе 2009 года выклікала шырокі грамадскі рэзананс і абурэнне шэрагу міжнародных праваабарончых арганізацый.
Следства па справе аб гібелі Магніцкага працягваецца ўжо больш за два гады. Акрамя Дзмітрыя Кратава, у якасці падазраванай фігуравала яго падначаленая Ларыса Літвінава, аднак у красавіку 2012 году Следчы камітэт спыніў крымінальны пераслед Літвінавай ў сувязі са зменамі ў Крымінальным кодэксе.
У снежні гэтага года ў ЗША быў прыняты «закон Магніцкага», які забараняе ўезд у краіну расейцам, якія маюць дачыненне да гібелі аўдытара.
У адказ расейская Дзярждума прыняла закон, які прадугледжвае санкцыі для асоб, якія маюць дачыненне, на думку Масквы, да парушэння правоў грамадзян Расеі. У гэты ж закон уключаная забарона амерыканскім грамадзянам усынаўляць сірот з Расеі.