Тры ВНУ Лукашэнкі
- 22.12.2012, 19:31
На сустрэчы са студэнтамі БДУІР Аляксандр Лукашэнка прызнаўся, што скончыў тры ўніверсітэты.
Аднак у біяграфіі на сайце кіраўніка дзяржавы названыя толькі дзве ВНУ. Дзе афіцыйны лідар атрымаў трэцюю вышэйшую адукацыю?
У пятніцу Лукашэнка сказаў студэнтам Беларускага дзяржаўнага універсітэта інфарматыкі і радыёэлектронікі, што дакладныя навукі - не ягоны канёк, і ён, напэўна, не змог бы вучыцца ў гэтай ВНУ. На рэпліку рэктара БДУІР Міхаіла Батуры аб тым, што кіраўніку дзяржавы б дапамаглі, Лукашэнка адказаў, што больш вучыцца ўжо не хоча: «Я іх тры скончыў, мне ўжо досыць. Дваццаць з лішкам гадоў вучыўся».
Згодна з біяграфіяй на афіцыйным інтэрнэт-партале president.gov.by, Аляксандр Лукашэнка скончыў дзве ВНУ: Магілёўскі дзяржаўны універсітэт імя Куляшова ў 1975 годзе са спецыяльнасцю «гісторык» і Беларускую сельскагаспадарчую акадэмію ў 1985 годзе са спецыяльнасцю «эканаміст».
«Салідарнасць» пацікавілася ў кіраўніка прэс-службы Лукашэнкі Паўла Лёгкага, дзе Аляксандр Лукашэнка атрымаў трэцюю вышэйшую адукацыю.
- Драбніц не ведаю, - сказаў кіраўнік прэс-службы. - Трэба ўдакладніць. У савецкі час была яшчэ вышэйшая партыйная школа. У бацькі на заводзе майстар пісаў: адна вышэйшая адукацыю. А дыплом аб заканчэнні вышэйшай партыйнай школы дома ляжаў.
- Можа быць, Аляксандр Лукашэнка пад трэцяй адукацыяй меў на ўвазе свой першы прэзідэнцкі тэрмін? - выказала здагадку карэспандэнтка.
- Не выключана, - адказаў Павел Лёгкі. - Прэзідэнт і раней казаў пра тое, колькі яму давялося вучыцца ў першыя гады.
Кіраўнік прэс-службы прапанаваў ператэлефанаваць яму пазней, а ён, у сваю чаргу, паспрабуе ўдакладніць, які трэці ўніверсітэт скончыў Лукашэнка.