Еўрапарламент патрабуе забараніць продаж тэхналогій беларускаму рэжыму
- 8.11.2012, 1:35
Тэхналогіі, якія выкарыстоўваюцца для цэнзуры і сачэння, не павінны прадавацца дыктатарам.
Камітэт Еўрапарламента па замежных справах прапануе забараніць продаж краінамі ЕЗ інфармацыйных тэхналогій, якія могуць быць выкарыстаны рэпрэсіўнымі рэжымамі для цэнзуры інфармацыі і праслухоўвання апанентаў.
«Еўрапейскія кампаніі, іх даччыныя прадпрыемствы і партнёры павінны гуляць ключавую ролю ў распрацоўцы і распаўсюджванні сацыяльных стандартаў ва ўсім свеце», - гаворыцца ў рэзалюцыі камітэта, распрацаванай дэпутатам Леанідасам Донскісам з Літвы, паведамляе сайт Еўрапарламента (пераклад - charter97.org).
Еўрадэпутаты асудзілі тое, што некаторыя еўрапейскія прадпрыемствы падаюць неабмежаваны доступ аўтарытарным рэжымам у свае банкі даных на падставе адпаведнасці з мясцовым заканадаўствам, як гэта было ў выпадку з кампаніяй Teliasonera у некаторых постсавецкіх дзяржавах.
Пры гэтым дэпутаты віталі рашэнне Савета ЕЗ забараніць экспарт некаторых інфармацыйных тэхналогій у Сірыю і Іран і настойвалі на тым, каб гэтая забарона паслужыла ў будучыні прэцэдэнтам для абмежавальных мер супраць іншых рэпрэсіўных рэжымаў.
Лівія і Сірыя
Камітэт адзначыў ролю ЕЗ і дзяржаў-членаў звяза ў папярэджанні гвалту супраць грамадзянскіх асоб у Лівіі ў 2011 годзе, але выказаў сваё расчараванне тым, што намаганні ЕЗ і міжнароднай супольнасці не прынеслі ніякіх паляпшэнняў у дадзеным пытанні ў Сірыі.
Еўрапарламентарыі таксама падтрымалі праект еўрапейскай ініцыятывы па прадастаўленні часовага прытулку ў ЕЗ абаронцам праў чалавека, вымушаным тэрмінова пакідаць свае краіны.
Беларусь
Члены камітэта выказалі занепакоенасць недахопам дэмакратыі, павагі прававой дзяржавы, асноўных свабод і праў чалавека ў Беларусі. У прыватнасці, іх заклапочанасць выклікае сітуацыя з пазбаўленнем волі кандыдата ў лаўрэаты прэміі імя Сахарава за 2012 год Алеся Бяляцкага. Еўрапарламентарыі выказалі шкадаванне дзеяннямі польскіх і літоўскіх чыноўнікаў, якія спрыялі арышту Бяляцкага, падаўшы банкаўскую інфармацыю.
Праваабаронцы
Камітэт падтрымаў ініцыятыву краін ЕЗ па прадастаўленні прытулку актывістам па абароне праў чалавека, якія былі вымушаныя пакінуць сваю радзіму.
Смяротнае пакаранне
Члены камітэта віталі рашэнне Еўракамісіі ўзмацніць кантроль над экспартам матэрыялаў, якія могуць быць выкарыстаны пры ўжыванні смяротнага пакарання. Яны таксама далі станоўчую ацэнку мерам, прынятым некаторымі еўрапейскімі фармацэўтычнымі прадпрыемствамі для забароны экспарту прэпаратаў у шэраг краін, дзе існуе рызыка выкарыстання адпаведных субстанцый для прывядзення ў выкананне смяротных прысудаў.
Еўрадэпутаты выказалі шкадаванне, што колькасць прыведзеных у выкананне смяротных прысудаў вырасла ў Іране, Іраку і Саудаўскай Аравіі. Яны таксама адзначылі адмову Кітая ад раскрыцця інфармацыі аб прымяненні смяротнага пакарання і прывядзенні ў выкананне смяротных прысудаў.
Нагадаем, шэраг шведскіх СМІ раней абвінавацілі тэлекамунікацыйную кампанію TeliaSonera у дапамаганні беларускім спецслужбам.
Многія эксперты ў галіне камунікацыйных тэхналогій схіляюцца да думкі, што TeliaSonera, выходзячы на рынкі недэмакратычных краін, першапачаткова ўсведамляла, што будзе вымушана дапамагаць дыктатуры праслухоўваць, каго тая захоча і калі захоча.
Па словах прафесара Эрыка Строма з Гётэборгскага ўніверсітэта, пасля «арабскай вясны» ўсё больш урадаў зацікаўлены ў тым, каб кантраляваць насельніцтва з дапамогай сотавай сувязі. Знайсці і перахапіць карыстальніка - абсалютна не праблема. Тым больш што ў той жа TeliaSonera, дакладней - у яе даччыных фірмах у Беларусі, Азербайджане, Казахстане, Узбекістане ёсць праграма «чорных скрыняў», да якой, у сваю чаргу, маюць доступ спецслужбы гэтых краін.