Звольнены начальнік ваеннай контрвыведкі КДБ
- 18.10.2012, 16:58
Лукашэнка правёў гучную кадравую чыстку Камітэта дзяржаўнай бяспекі.
Па прадстаўленні старшыні КДБ звольнены начальнік Упраўлення ваеннай контрвыведкі КДБ генерал-маёр Аляксей Захараў, піша блогер d-zholik.
Адначасова рашэннем Лукашэнкі новым начальнікам УВКР КДБ прызначаны чалавек апальнага экс-міністра МУС Уладзіміра Навумава палкоўнік Аляксандр Назаранка, які апошнія дзесяць гадоў праходзіў службу на розных пасадах у Міністэрстве ўнутраных спраў.
Захараў у бытнасць старшынёй КДБ Юрыя Жадобіна ўзначальваў галоўнае ўпраўленне контрвыведкі Камітэта дзяржаўнай бяспекі (падраздзяленне т.зв. агульнай контрвыведкі).
Да прыходу Жадобіна пасада начальніка галоўнага ўпраўлення КДБ адначасова сумяшчалася з генеральскай пасадай намесніка старшыні КДБ. Затым Юрый Жадобін, які не справіўся з абавязкамі дзяржаўнага сакратара Савета бяспекі і ў сувязі з гэтым паніжаны на пасадзе да старшыні КДБ, змяніў структуру Камітэта, павялічыўшы штат яго кіравання: пасады намеснікаў кіраўніка камітэта і начальнікаў глаўкаў цэнтральнага апарата былі падзеленыя.
У канцы 2008 года з прыходам у КДБ новым кіраўніком памежніка Вадзіма Зайцава Захараў быў прызначаны ўказам Лукашэнкі на пасаду начальніка Упраўлення ваеннай контрвыведкі КДБ. Хоць у назве новай пасады і падраздзялення і адсутнічае слова «галоўнае», але пасада начальніка УВКВ генеральская. У лютым 2010 года Лукашэнка прысвоіў Аляксею Захараву вайсковае званне генерал-маёра.
А вось яго зменшчыку - палкоўніку Аляксандру Назаранке яшчэ толькі трэба будзе прымерыць генеральскія пагоны. Так як, не набыўшы лаўраў на кадравай службе ў контрвыведцы КДБ, ён нічога асабліва не дамогся і падчас свайго працяглага знаходжання ў штаце Міністэрства ўнутраных спраў. А апошнія гады так і наогул фактычна быў спісаны.
У бытнасць Уладзіміра Навумава Міністрам МУС кадравы супрацоўнік КДБ А.Назаранка ўзначальваў у МУС упраўленне ўласнай бяспекі, затым у 2003 г. рашэннем Лукашэнкі быў прызначаны на пасаду начальніка Камітэта па барацьбе з арганізаванай злачыннасцю і карупцыяй Міністэрства ўнутраных спраў Рэспублікі Беларусь.
Затым камітэт быў ператвораны ў галоўнае ўпраўленне па барацьбе з арганізаванай злачыннасцю МУС (ГУБАЗ), якое стаў узначальваць Назаранка.
Затым яго знялі з пасады начальніка галоўнага антымафіёзнага падраздзялення МУС, а таксама звольнілі і яго намесніка. Генеральным пракурорам было нават унесена прадстаўленне аб грубых парушэннях закона ва ўзначаленым Назаранкам падраздзяленні. Пракурорская праверка выявіла, што супрацоўнікі глаўка ні ў чым невінаватых людзей закрывалі і ўтрымлівалі ў СІЗА, актыўна фізічна выбівалі паказанні з падазраваных і падследных, аператыўныя мерапрыемствы (распрацоўкі) праводзіліся без належных на тое падстаў і г.д.
Але «бясцэнны» вопыт палкоўніка Назаранкі апынуўся патрэбным і ў далейшым і яго прызначылі на новую пасаду - намеснікам начальніка Акадэміі МУС па кадравай і выхаваўчай працы, дзе яму трэба было дзяліцца сваім спецыфічным вопытам і вучыць асаблівым ведам будучыя пакаленні супрацоўнікаў беларускай міліцыі і дзяржбяспекі.
Апала палкоўніка Назаранкі доўга не працягнулася і вось чалавек Уладзіміра Навумава заняў генеральскую пасаду ў КДБ.
Такім чынам, у чарговы раз выявіліся класічныя падыходы Аляксандра Лукашэнкі ў кадравай працы па сілавым блоку. Палкоўнік МУС, пераведзены на некаторы час у КДБ, вярнуўся ў МУС на пасаду міністра і стаў генералам (Шуневіч), а кадравы супрацоўнік КДБ, які боўтаўся дзесяцігоддзе па паверхах МУС - вярнуўся ў КДБ і таксама на генеральскі пост (Назаранка).