«Дынама» звольніў Кары Хейкіля
- 12.10.2012, 16:42
Наглядальны савет хакейнага клуба «Дынама» (Менск) прыняў рашэнне аб звальненні галоўнага трэнера каманды.
Выконваючым абавязкі галоўнага трэнера прызначаны Аляксандр Андрыеўскі, паведаміла 12 кастрычніка прэс-служба клуба. Канчатковае рашэнне па галоўнаму трэнеру будзе прынята ў лістападзе, перадае БелаПАН.
«Аляксандр Андрыеўскі - шматгадовы лідэр нацыянальнай зборнай Беларусі, адзін з лепшых хакеістаў краіны за ўвесь перыяд выступлення нацыянальнай дружыны, - адзначаецца ў паведамленні. - Па заканчэнні кар'еры ігрок дамогся станоўчых вынікаў у якасці трэнера. У 2009 годзе ўзначаліў хакейны клуб «Гомель» і прывёў яго да срэбраных медалёў адкрытага чэмпіянату Беларусі. Па ходзе сезона 2009-2010 узначаліў «Дынама» (Менск). Пры ім каманда правяла 41 матч, у якіх атрымала 16 перамог і заняла 17-е выніковае месца ў рэгулярным першынстве КХЛ. Галоўным жа дасягненнем Андрыеўскага на пасадзе галоўнага трэнера «Дынама» стала перамога ў прэстыжным Кубку Шпенглера. На апошніх чэмпіянатах свету Аляксандр Андрыеўскі ўваходзіў у трэнерскі штаб нацыянальнай зборнай Беларусі. На працягу двух сезонаў працаваў асістэнтам Марэка Сікоры».
Пры разглядзе кандыдатуры новага галоўнага трэнера «абмяркоўваліся яго прафесійныя якасці, здольнасць эфектыўна кіраваць камандай».
«Пры прызначэнні ўлічваўся і той факт, што ўсяго некалькі месяцаў засталося да алімпійскай кваліфікацыі, да якой трэба падвесці беларускіх ігракоў «Дынама» у аптымальнай форме... Перад камандай застаецца задача выйсці ў зону плэй-оф», - адзначаецца ў прэс-рэлізе.
Пасля 16 гульняў «Дынама» з 18 ачкамі займае сёмае (апошняе) месца ў дывізіёне Тарасава, 12-е месца ў Заходняй канферэнцыі і 22-е ў агульнай табліцы. Каманда атрымала 5 перамог у асноўны час, 1 у овертайме, пацярпела 9 паражэнняў у асноўны час і 1 у авертайме, закінула 34 і прапусціла 52 шайбы. У апошнім матчы 11 кастрычніка супраць «Данбаса» дынамаўцы вялі 5:1 і ледзь утрымалі перамогу - 5:4.
Кары Хейкіля пакуль застаецца на пасадзе галоўнага трэнера зборнай Беларусі.