Нацбанк валюту для абменнікаў больш не дасць

• 22.03.2011, 14:00

Нацбанк спыніў продаж валюты камерцыйным банкам для забеспячэння попыту насельніцтва на наяўную валюту.

Ліст пра гэта атрымалі камерцыйныя банкі краіны.

«Так, такі ліст было ў банкі накіраваны», - сказаў начальнік упраўлення інфармацыі Нацбанка Анатоль Драздоў, каментуючы інфармацыю, якая з'явілася ў банкаўскіх колах, аб прыпыненні продажу валюты банкам для падтрымкі пунктаў абмену валют, перадае «Інтэрфакс Захад».

Як паведамлялася, з 16 сакавіка Нацбанк прадаваў банкам замежную валюту для падмацавання абменнікаў на суму перавышэння фактычнага продажу наяўнай замежнай валюты фізічным асобам над сумай пакупкі ў іх. Такі парадак быў уведзены паралельна з павелічэннем з гэтай даты тэрмінаў рэзервавання сродкаў на набыццё замежнай валюты на біржы з 1 да 30 дзён пасля шэрагу іншых абмежавальных мер.

НББ, такім чынам, прапануе камерцыйным банкам самастойна забяспечваць патрэбы ўнутранага рынку ў замежнай валюце на ўсіх сегментах, дэ-факта адмовіўшыся ад валютных інтэрвенцый ва ўмовах зніжэння золатавалютных рэзерваў на 20% за студзень-люты.