«Газпром» атрымае поўны кантроль над «Белтрансгазам»

• 31.03.2010, 9:12

Расейская кампанія «Газпром» разлічвае сёння замяніць кіраўніка назіральнага савета «Белтрансгаза».

«Газпром» разлічвае на абранне намесніка старшыні праўлення гэтай карпарацыі Валерыя Голубева кіраўніком назіральнага савета «Белтрансгаза». Зараз гэтую пасадузаймае першы віцэ-прэм'ер Беларусі Уладзімір Сямашка.

Сёння «Газпром», які расплаціўся з Менскам за 50% акцыяў «Белтрансгаза», атрымае яшчэ адно дадатковае месца ў назіральным савеце (савеце дырэктараў) кампаніі. Цяпер у ім, а таксама ў дырэкцыі (праўленні) «Белтрансгаза» будзе па чатыры расейскіх і беларускіх прадстаўніка, піша газета «Коммерсант».

Але парытэт яшчэ не гарантуе «Газпрому» дадатковых правоў у кіраванні. Яны будуць вызначаныя пагадненнем акцыянераў кампаніі і стануць прадметам асобных перамоваў, адным з ключавых элементаў якіх можа стаць кошт на газ для Беларусі.

Сёння ў Менску адбудзецца агульны гадавы сход акцыянераў ААТ «Белтрансгаз», якім на парытэтных пачатках валодаюць «Газпром» і урад Беларусі. Па словах гендырэктара беларускай кампаніі Уладзіміра Маёрава, з васьмі чальцоў назіральнага савета (аналаг савета дырэктараў) чацвёра будуць прадстаўнікамі «Газпрома» (зараз трое), чацвёра - прадстаўнікамі Беларусі.

18 траўня 2007 года «Газпром» і Дзяржкамітэт па маёмасці Беларусі падпісалі дамову куплі-продажу расейскай манаполіі 50% акцыяў «Белтрансгаза» за $ 2,5 млрд. Апошні транш «Газпром» пералічыў у канцы лютага.

У расейскай манаполіі неафіцыйна распавялі, што акрамя намесніка старшыні праўлення «Газпрама» Валерыя Голубева, кіраўніка юрыдычнай дэпартамента Мікалая Дубіка і начальніка упраўлення карпаратыўнага кантролю дэпартамента па кіраванні маёмасцю і карпаратыўных стасунках Мікалая Васільева ў савет будзе прапанаваны начальнік аддзела ўпраўлення па працы з краінамі блізкага замежжа «Газпрома» Аляксандр Фралоў. «Газпром» таксама разлічвае на абранне Голубева кіраўніком савета. Зараз гэтае месца займае першы віцэ-прэм'ер Беларусі Уладзімір Сямашка. Па тым жа прынцыпе будзе сфарміраваная і дырэкцыя (аналаг праўлення) «Белтрансгаза» - па чатыры чалавекі ад беларускага і расейскага бакоў.

Аднак падрабязна парадак кіравання «Белтрансгазам» павінна вызначыць пагадненне акцыянераў, якое, паводле звестак знаёмай з сітуацыяй крыніцы «Коммерсанта», сёння падпісанае не будзе. Пакуль кампанія кіруецца ў прававых межах міжурадавых пагадненняў Расеі і Беларусі па газе. Уладзімір Маёраў упэўнены, што ключавыя рашэнні пасля рэфармавання органаў кіраўніцтва «Белтрансгаза» будуць прымацца, як і раней, адзінагалосна. У «Газпроме» называюць пытанне карпаратыўнага кіравання «прадметам няпростых перамоваў, якія маюць адбыцца».

Адным з ключавых элементаў перамоваў стане кошт газу для Беларусі. Зараз ён складае, паводле дадзеных «Газпрома», $ 168 за тысячу кубаметраў, паводле дадзеных Белстата - $ 171. Беларусь даўно патрабуе прывесці кошт да ўзроўню 2009 года - $ 155 (0,7-0,75% да сярэднееўрапейскага за вылікам мытнай пошліны). Больш за тое, Менск аплачвае расейскі газ з пачатку 2010 года па ранейшай цане, што дало падставу чальцу праўлення «Газпрома» Андрэю Круглову ў нядзелю заявіць пра запазычанасць Беларусі ў памеры $ 94 млн. Паволе інфармацыі газеты «Коммерсант», Беларусь вылучае ўмову захавання коштаў як галоўную для абрання кіраўніком назіральнага савета «Белтрансгаза» Валерыя Голубева.

У «Газпроме» кажуць, што зніжаць кошты не маюць намеру, бо для Украіны на той жа перыяд ўстаноўлены кошт $ 305 за тысячу кубаметраў. Але крыніцы Reuters і «Інтэрфакс» у беларускім урадзе днямі сцвярджалі, што кошт можа быць зніжаны ў абмен на адмову ад адлічэнняў «Белтрансгаза» у інавацыйны фонд Мінэнерга Беларусі. Яны павялічваюць сабекошт паслугаў кампаніі, зніжаючы яе прыбытковасць. На запатрабаванне «Газпрома» гэтыя адлічэнні ўжо былі зніжаныя з 18 да 9% ад абаротных сродкаў. Андрэй Круглоў патлумачыў: «Мы імкнемся атрымаць кантроль у «Белтрансгазе», таму «Газпром» будзе ўважліва разглядаць кожную прапанову ў межах карпаратыўных нормаў даходнасці на інвестыцыі». Паводле яго словаў, у «Газпроме» нормы прыбытковасці на інвестыцыі складаюць не менш за 12% (прыбытковасць «Белтрансгаза» у 2008 годзе - 9%).