У менскіх крамах не прымалі банкаўскія карткі
- 31.01.2010, 15:56
Наведнікі менскіх крамаў у нядзелю ў разгар дня не маглі аплаціць сваю пакупку з дапамогай пластыкавых картак.
Як паведамілі «Інтэрфаксу» чытачы, у цэнтры беларускай сталіцы ніводная крама не прымала да разліку карткі.
У службе сэрвісу Банкаўскага працэсінгавага цэнтра паведамілі, што мелі месца збоі ў сістэме, аднак па стане на 14.40 нядзелі праца плацёжных тэрміналаў адноўленая.
У той жа час у службе сэрвісу працэсінгавага цэнтра не змаглі паведаміць, колькі часу не працавалі тэрміналы, а таксама меў месца лакальны збой ці аперацыі з пластыкавымі карткамі былі немагчымыя ва ўсіх крамах Менска. «У мяне няма такіх звестак», - сказала аператарка.
Як ужо паведамляў сайт charter97.org, у Беларусі ў апошні час ужо некалькі разоў узнікалі сітуацыі, калі масава не працавалі банкаматы, і людзі не маглі зняць са сваіх картак грошы. Супрацоўнікі банкаў апраўдвалі гэта тым, што збоі нібыта звязаныя з праграмным забеспячэннем - у сістэме завёўся вірус, які ніяк не могуць пераадолець.