Зноў падоўжаныя тэрміны следства па справе аб знікненні Юрыя Захаранкі

• 8.10.2009, 14:23

Следства па справе аб знікненні былога міністра ўнутраных спраў Беларусі Юрыя Захаранкі падоўжана да 24 кастрычніка.

Пра гэта БелаПАН паведаміў праваабронца Алег Воўчак.

Паводле яго словаў, адпаведны ліст сваякі атрымалі з пракуратуры Менска, аднак у ім не ўдакладняецца, якія следчыя дзеянні праводзяцца па гэтай справе.

Акрамя гэтага, як паведаміў Воўчак, сваякі Захаранкі атрымалі электронны ліст з адказам на свой запыт з Міністэрства замежных спраў Беларусі. «Нагадаю, сваякі звярталіся ў беларускі МЗС адносна неаднаразовых выказванняў Аляксандра Лукашэнкі пра тое, што сляды забойцы Захаранкі знаходзяцца ў Нямеччыне. МЗС адказаў, што гэтая структура расследаваннямі крымінальных спраў не займаецца, а зварот сваякоў будзе перададзены ў Міністэрства замежных спраў Нямеччыны. Такім чынам, расследаваннем знікнення Захаранкі і праверкай словаў Лукашэнкі зоймецца нямецкая паліцыя», — паведаміў Воўчак.

Воўчак таксама нагадаў, што ў кастрычніку адбудзецца паседжанне працоўнай групы па гвалтоўных знікненнях ААН, на якім будзе прааналізавана дзейнасць беларускіх уладаў у пошуках Юрыя Захаранкі і астатніх зніклых беларускіх апазіцыянераў. Праваабаронцы ўжо выказалі сваё меркаванне на гэты конт. Алег Воўчак, у прыватнасці, лічыць, што беларускія ўлады «імітуюць следства».

Нагадаем, што ў 1999-2000 гадах у Беларусі зніклі першы віцэ-спікер Вярхоўнага Савета Беларусі 13 склікання, старшыня Цэнтральнай выбарчай камісіі Віктар Ганчар, бізнэсмэн і грамадскі дзеяч Анатоль Красоўскі, экс-кіраўнік МУС, які пасля стаў апазіцыйным палітыкам, Юрый Захаранка і аператар расейскага тэлеканала ОРТ Зміцер Завадскі.

Аб неабходнасці высветліць лёс зніклых беларускіх апазіцыянераў стала заяўляе міжнародная супольнасць. Патрабаванне раскрыць праўду аб іх знікненні змяшчаецца ў рэзалюцыях Камісіі ААН па правах чалавека, Парламенцкіх асамблей Рады Еўропы і АБСЕ.

Шэрагу высокапастаўленых беларускіх чыноўнікаў, у прыватнасці экс-міністру ўнутраных спраў Уладзіміру Навумаву, былому сакратару Савета бяспекі Віктару Шэйману, былому кіраўніку МУС Юрыю Сівакову і экс-камандзіру СОБРа Дзмітрыю Паўлічэнку забаронены ўезд у краіны Еўразвяза і ЗША з-за падазронаў у іх дачыненні да выкраданняў апазіцыянераў.