Хуткая дапамога прыязджае на Акрэсціна кожны дзень

• 18.01.2008, 9:06

Хуткую дапамогу да тых, хто быў затрыманы пасля акцыі пратэсту 10 студзеня, на Акрэсціна выклікаюць практычна кожны дзень. Як паведамляе адвакат Вера Страмкоўская, учора тэрміновая медыцынская дапамога запатрабавалася Сяргею Парсюкевічу. У яго здарыўся прыступ астмы на фоне высокай тэмпературы.

Некалькі дзён таму хуткая дапамога прыязджала да Таццяны Цішкевіч. У дзяўчыны падазрон на запаленне лёгкіх. У большасці камер Цэнтра выпраўлення правапарушэнняў на Акрэсціна – холадна, моцна дзьме ад вокнаў, і таму шчыліны арыштаваныя спрабуюць затыкаць папяровымі сурвэткамі. Лекары рэкамендавалі Таццяне лячэнне ў шпіталі, аднак дзяўчына ад шпіталізацыі адмовілася. На сёння Таццяна прымае антыбіётыкі.

Адразу пасля змяшчэння на Акрэсціна хуткую дапамогу выклікалі і Куксюку Юрыю. У яго быў падазрон на пашкоджанне рабра. Падчас суду Юры казаў, што ў ходзе затрымання яго моцна збівалі…

І толькі што адміністрацыі сайта www.ucpb.org стала вядома, што ў адзін з сталічных шпіталяў хуткая дапамога даставіла Сяргея Клюева. Ён пакутуе на боль, у яго падазрон на апендыцыт і захворванне нырак.